Romans 10

Pol wi Isrel iiwawun Yeesus opora opuk nain kookalek

1Emar unowik, yo kookalowa manek akena efar ikua, feenap, yena owow epaskun, wi Isrel unowiya wia naiyem. Yeesus opora wiar opiwkin Mua Maneka-ke wia aawinok akena naiyem. Yo nain kema moke maneka ikok Mua Maneka faremi kerewa nokariyem. 2Moram yo feenap maemi wia maiyem, makena wi Mua Maneka yia kookalinok naep sira unowa ookowa uufunimik. Nain wi Mua Maneka kookalowa me wiar amisarep naap onimik. 3Wi Mua Maneka wia kakenami mua kaken eliwa wia naowa era nain wia maakemik-na wi kema me pukemik. Wi maimik, yiena kekanowa-pa Moses sira unowa ookamkun Mua Maneka mua kaken eliwa yia nainok. Naap maemi Mua Maneka eena era wia wuomak nain me ookimik. 4Ne wi fain me amisaremik. Moses eena sira wuomakek nain Krais-ke waisow ookap silewak. Naapeya me sira nain ookowa-pa Mua Maneka wiar ikiwiyen, weetak. Yeesus opora wiar opimik nain Mua Maneka-ke wi pina marew wia naemi wia aawinon. Wi Isrel fain me amisaremik.

Yeesus yiena Maneka-ke naiwkin Mua Maneka-ke wia aawinon

5Aria Moses sira wuomakek nain ookami pina marew ikowa nain Moses ona feenap maek, “Wi sira nain baliwep ookap Mua Maneka wameiya eliw ikaiyen naep-na wi baliwep ookami silewuk.” 6Nain Mua Maneka wameiya ikowa nain i Yeesus opora opamkun Mua Maneka-ke pina marew mua kaken eliwa yia naiya. Ni woosa unu-unowa wuami kema-pa me maeka, “Nee, mua naareke owow iinan urupep Krais amaporainon noma.” 7Ne opor oko pun me maeka, “Nee, mua naareke miiw tepak akena mua umep ikiwimik neeke orop Krais purupinon noma.” 8Nain weetak, moram Moses feenap maemi maek,

“Mua Maneka opora anane maiwkin miimiman. Ni anane nain aakuniman, ne niena kema-pa amisareman.”
(Lo 30.12-14)

Opora nain Yeesus Krais opor eliwa eena i nia maakem-miawimik nain. 9Nain sira feenap, nena opaimika-pa ariman mainan-na, “Makena, Yeesus-na yena Maneka-ke.” Naap maemi kema-pa mainan-na, “Aa makena, o umep ikaeya Mua Maneka-ke iikirowak.” No opora muut naap mainan-na makena, Mua Maneka-ke nefa aaweya o wameiya eliwa ikainan. 10Moram no opora wiar opan ne nena kema pun makena naen. Nan Mua Maneka-ke no pina marew nefa naek. No opora wiar opap nena opaimika-pa maeya Mua Maneka-ke nefa aaweya eliwa ikainan. 11Opora nain makena-ke, moram Mua Maneka opor ara oko feenap maek,

“Wi mua o opora opimik nain, wi unowiya me oboserikuan, maa makena urufikuan.”
(Aisaiya 28.16)

12Ne aria yo opora maem nain yiena Yuuda yiam maemi wi owow oko pun wia maem, i epaskun yiena Maneka kuisow, yiam mekawowa-ko me ikua. Naeya o farep maa nokaremkun yia kookalep maa unow akena yia onominon. 13Moram Mua Maneka opor ara oko feenap maek,

“Wi mua yiena Maneka unuma farimik nain ona wia aaweya eliwa ikaikuan.”
(Yoel 2.32)

14Aria mua-ko me wia sesekikuan-na naareke ikip Yeesus Krais opora wia maakikuan? Ne Mua Maneka opora me manekap wia maakikuan-na aria kamenap miimikuan? Ne opora nain kamenap opikuan? Ne opora me opimik nain wi kamenap o fariwkin wia asipinon? Naapeya Mua Maneka opor ara oko feenap maek,

“Aa, eliw oram, wiena meren onaiya ekapemi Mua Maneka opor eliwa yia maakem-miawimik.”
(Aisaiya 52.7)

16Naapeya mua unowa iiriw opora miimamik, nain me mua unowiya opora opimik. Naeya iiriw profet Aisaiya pun feenap maek,

“Oo yiena Maneka, i ikiwep opora wia maakimik-na mua naareke opora yiar opinon?”
(Aisaiya 53.1)

17Aria naneka, Yeesus Krais opor eliwa ikip wia maakiwkin miimap neeke opora opikuan. Me wia maakikuan-na opora me miimap opikuan, weetak.

18Ne wi opora-ko me miimamik, naap maiman-i? Weetak, iiriw miimamik. Moram Mua Maneka opor ara oko feenap maek,

“Wi ikiwep miiw unowa owow unowa opora nain wia maakem-miawiwkin manekarek. Ne opora nain miiw unowa meta arimemi epa fiifinarek.”
(Someka 19.4)

19Ne kiiriw nia nokariyem, wi Isrel opora miimap kema-ko me pukemik-i? Nain pun weetak, wi kema aawemik. Moram Moses Mua Maneka opora maemi wi Isrel feenap wia maakek,

“Wi owow oko iiriw yo teeria-pa me efar ikemik nain, ikoka wia aawemkun ni kerewarowen. Ne wi teeria iiriw yo me efa amisaremik, ikoka wia aawemkun ni kema bagiwirowen.”
(Lo 32.21)

20Ne profet Aisaiya pun keker opow marew ariman wia maek,

“Mua Maneka-ke maek, ‘Makena, wi owow oko oko me efa kema suuwap me efa akupamik, nain yo yena yame ariman wuamkun efa amisarikuan.’”
(Aisaiya 65.1)

Aria wi Isrel-na Mua Maneka-ke feenap wia maek,

“Wi yo efar ekapuk naep wapena wuiyem-na wia, wi emina kekanep mikikira yiem-ikaimik.”
21(Aisaiya 65.2)